Kvíði

Kvíði er mjög algengur hjá fólki á einhverfurófi. Þunglyndi er sem betur fer ekki eins algengt en er samt algengari en hjá þeim sem eru ekki á einhverfurófinu.

Kvíði fólks á einhverfurófi er jafn fjölbreytilegur og hjá fólki sem er ekki á einhverfurófinu. Flestir gera sér grein fyrir að hann getur stafað því að eiga erfitt með að venjast nýjum aðstæðum eða eiga erfitt með samskipti.

Færri gera sér grein fyrir að stundum stafar kvíði fólks á einhverfurófi af of mikilli samkennd með öðrum. Þá hefur fólk á einhverfurófi of miklar áhyggjur af því hvernig öðrum líði eða muni líða. Einnig getur of mikið ímyndunarafl stuðlað að kvíða. Þannig á fólk á einhverfurófi sem er með mikið ímyndunarafl auðvelt með að sjá allt það sem getur farið úrskeiðis. Það getur verið kvíðavaldandi.

Þannig er margt sem stuðlar að kvíða hjá fólki á einhverfurófinu.

Ég legg áherslu á að takast á við kvíðann án þess að reyna að breyta einhverfueinkennum fólks. Ég segi fólki ekki að reyna að eignast 20 vini ef það vill ekki eiga 20 vini eða að hætta að hafa samkennd eða ímyndunarafl. Grunnþáttur í meðferð er að halda í og nýta einhverfueinkennin og í þeim tilfellum sem þau valda vanda að finna heppilegar leiðir án þess að breyta einhverfueinkennunum.

Þunglyndi og vonleysi hrjáir stundum fólk á einhverfurófi. Ég legg áherslu á sterka sjálfsmynd, sérhæfileika fólks á einhverfurófinu, að læra að lifa með einhverfurófsröskuninni og að læra að nýta hæfileika sína. Einnig bendi ég á fyrirmyndir úr fjölmiðlum eða sögunni til að sýna fram á að líf fólks á einhverfurófi getur verið skemmtilegt og að samfélagið þarfnast fólks á einhverfurófi.

Krossgatan - sálfræðiiráðgjöf Háaleitisbraut 13, 2. hæð krossgatan[hjá]krossgatan.is © Ã�sdís Bergþórsdóttir